«Самұрық-Қазына» 7 жаңа қайырымдылық жобаны іске қосады

Қамқоршылық кеңестің шешімімен «Samruk-Kazyna Trust» бірыңғай қайырымдылық операторы арқылы инклюзия, білім беру, спорт және мәдениет саласындағы әлеуметтік жобалар қолдауға ие болды.

Қазақстанда емделмейтін диагнозы бар балаларға көмектесетін «Балаларға өмір сыйла» жобасын іске асыру жалғасады. Өткен жылы ғана Қордың қаржылай қолдауымен 61 баланың шетелдегі емі төленді. «Аутизм жеңеміз!» жобасымен кешенді көмекпен аутизм спектрі бұзылған балаларды тәрбиелеп отырған 400-ден астам отбасы қамтылатын болады.

220 мүмкіндігі шектеулі балалар мен олардың ата-аналарына «All ability Camp» спорттық-инклюзивті лагері ұйымдастырылады, онда қатысушылар жаңа спорттық пәндерді меңгеріп, мотивациялық және психологиялық тренингтерге қатысады.
Еліміздің медициналық-әлеуметтік мекемелеріндегі ерекше қажеттіліктері бар балалардың, оның ішінде жетім балалардың өмір сүру сапасын жақсарту үшін Қордың қолдауымен 16 өңірде 1000-нан астам мемлекеттік балалар медициналық-әлеуметтік мекемелерінің мамандары Италиядан келген мамандарды оқыту әдістемесінің көмегімен арнайы әлеуметтік қызметтер көрсету бойынша біліктілігін арттырады.

Мемлекеттік тілді дамыту шеңберінде «Soyle» жобасы жұмысын жалғастырады. Онлайн-курстың арқасында бүгінде 1 миллионға жуық адам, оның ішінде шетелдіктер қазақ тілін үйренуде. Сабақтары бар бейнелер 12 миллион қаралым жинады.

Балаларды бұқаралық спортқа тарту және дамыту саласында Қор 500-ден астам бала мен ересектің қатысуымен «Astana CUP 2024» Шинкиокушинкай каратэ бойынша халықаралық турнирді өткізуге қолдау көрсетеді.

Ал Батыс Қазақстан облысында өңір жастарының шығармашылығын дамыту үшін түрлі креативті қоғамдық кеңістіктері бар «OzgeEpic Oral» креативті хабы құрылатын болады.
Айта кетейік, жыл басынан бері «Samruk-Kazyna Trust» бірыңғай қайырымдылық операторы жалпы сомасы 5,03 млрд теңгеге 18 жобаны іске асыруда.