«Самұрық-Қазына» қорының қолдауымен Алматы облысының 500 жуық оқушысы тегін қосымша білім алады

Алматы облысы Іле ауданының орталығы Өтеген батыр ауылында тұрмысы төмен отбасылардан барлығы 500-ге жуық бала тегін мектептен тыс қосымша оқумен қамтылуда. Бүгінде оның ішінде 360 бала қосымша білім алып үлгерді. «Самұрық-Қазына» АҚ компаниялар тобы атынан «Samruk-Kazyna Trust» қоры қаржылай қолдаған жобаның ерекшелігі, кішкентай шәкірттерге зейнеттегі тәжірибелі педагогтар сабақ береді.

«Жалпы білім саласы біздің үнемі назарымызда. Көргені көп, өмірден түйген даналығы мол егде жастағы педагог аға-апаларымыздың зейнетке шыққанына қарамастан, жас буынды тәрбиелеп, сауатын ашуда белсенділік танытып жатқаны қуантады. Осылайша тұрмысы төмен отбасыларда тәрбиеленіп жатқан жеткіншектердің тұлғалық дамуына ден қойылуда», - деп атап өтті «Samruk-Kazyna Trust» қорының бас директоры Альфия Адиева.

«Шыңға өрлеу» деп аталатын бұл әлеуметтік клубта жұмыспен қамтылған әлеуметтік осал топтағы 25 педагог-тәлімгер 1-4 сыныптың 120-дан астам оқушысын күнделікті тегін оқытады. Осылайша ұрпақтар сабақтастығы қалыптасып, өзін жалғыз сезінуден арылуға мүмкіндік алған қариялар балаларға қамқорлық танытып, жылуын сыйлайды, тәжірибесімен, даналығымен бөліседі.

Балаларға негізгі мектеп пәндері (математика, қазақ, орыс, ағылшын тілдері, IT-технологиялар) бойынша үй тапсырмасын дайындауда кәсіби көмек көрсетіліп қоймай, сонымен қатар бастауыш сынып оқушылары дене шынықтыру, сәндік-қолданбалы өнер, шахмат, хореография, музыка, домбыра, үй шаруашылығы және т.б. спорттық секциялар мен шығармашылық үйірмелерге қатысады.

«Әр тәрбиеленушінің үйлесімді тұрғыда дамуына назар аударылады. Бұл тұрғыда жұмыс мемлекеттік бастауыш білім беру стандарттары талаптарына негізделген. 6 ай ішінде мемлекеттік және ұлттық, басқа да мерекелерге орай 30 тәрбиелік мәндегі шара өткізілді. Клубқа келуші өскелең ұрпақтың 70 пайызында білім сапасының артқаны байқалады. Күнтәртібін де денсаулық жақсарып, көңіл-күй көтерілетіндей тиімді құруға тырысамыз. Балалар театрлар мен кинотеатрларға, кітапханалар мен мұражайларға, хайуанаттар бағына барады», - деп әңгімелейді «Шыңға өрлеу» әлеуметтік клубының басшылығынан.

Жоба барысында оқушылардың ата-аналарына психологиялық көмекте көрсетіледі.