Алматыда тұратын жасөспірім аяқпен сурет сала алады. «Samruk-Kazyna Trust» қоры ерекше балаларға жаңа дағдыларды дамытуға көмектесіп жатыр

19/04/2022

Баршаға аян, рухы асқақ адамдар шабыттандырады, ынталандырады және жан-жағына үміт отын сыйлайды. Алматылық 16 жасар Георгий Павленко да үлкен ерік-жігерге, батылдыққа және өзіне деген мызғымас сенімге ие. Оның бала кезінен тірек-қимыл аппаратының жұмысында бұзылулар бар. Алайда мұндай ерекшелік кейіпкерімізге басқаларға мүмкін емес болып көрінетін белестерді бағындыруға кедергі келтірмейді. Мысалы «Samruk-Kazyna Trust» әлеуметтік жобаларды дамыту қоры қолдайтын кәсіби бағдарланған онлайн-мектепте сурет салу немесе оқуды тілге тиек етсек болады.

Оның анасы, табысты кәсіпкер Анна Павленко бізбен ұлының оқиғасымен бөлісті. 

 «Баламның физикалық ерекшеліктермен туғанын білгенде, алғашында есеңгіреп, абдырап қалғаным рас. Айналамдағылардың барлығы сөйтті. Осылайша өзімізге келіп, сабамызға түскенде емнің барлық түрін қарастыра бастадық. Санамды сансыз ой мазалады: қайтпек керек, жағдайды қалай жақсартқан, балама қалай көмектескен абзал деген сияқты. Дәрігерлер ешқандай кепілдік бермек түгілі, ұлымның ешқашан жүрмейтініне көнуімді кеңес етті. Әрине мұның бәрін қабылдау қиынға соқты», - дейді ол.

Ұлының ауыр сырқатымен бетпе-бет келген Анна осы күннен бастап оның өмірі бұрынғыдай болмайтынын жан-тәнімен сезінді.

«Бірінші жылдары біз бәрін байқап көрдік - саналуан қалалар мен елдерде емделдік, Қытай мен Ресейдің және Қырғызстанның оңалту орталықтарында болдық. Қысқасы кез-келген жылт еткен жаңалыққа, қылтиған мүмкіндікке жармастық. Бірақ дәрігерлермен сөйлесе келе, Георгийдің құлан-таза айығып кету мүмкін еместігі айқындалды. Алайда физикалық және психологиялық тұрғыдан дұрыс оңалту шаралары арқылы баламыздың біртіндеп жылдар өте дене қимылдарын алмастыра алатынын ұғындық», - дейді Анна.

Қазақстанда физикалық ерекшеліктері бар балаларға білім беруге ерекше көңіл бөлінеді делінгенімен, іс жүзінде алаңдататын жайттар баршылық. Мәселен мамандардың қорытындысы бойынша Георгийге үйде оқуға ұсыныс берілді. Тірек-қимыл бұзылыстары бар балаларға арналған мектепке бару үшін жоғарғы немесе төменгі жақ белсенді болуы қажет. Георгийде бұл әрекеттер толық бұзылған. Ал үйде оқу оқшаулауға әкеліп, бұл жағдайда баланы әлеуметтендіруге қалай қол жеткізуге болатынын ойлантты.

Сондықтан Георгий үйде білім алудан өзге, күндізгі орталыққа бара бастады және 10 жасқа дейін бұл мүмкіндікке қатты қуанатын. Басқа балалармен қарым-қатынас, сабаққа қатысу көңілді сергітіп, еңсені көтеретін. Бірақ есейген сайын бала оқудан суыды. Өйткені физикалық және менталды ауытқулары бар балаларды оқыту айырмашылықтар бар. Георгий болса, көбірек білуге құмартты.

Қазір ол білім алуда ерекше мұқтаждығы бар жасөспірімдерге арналған «Leader Z» кәсіптік бағдарлау онлайн-мектебіне барады. Жобаны «Iteachme» қоры «Samruk-Kazyna Trust» әлеуметтік жобаларды дамыту қорының қолдауымен іске асырады және жасөспірімдерге кәсіби дағдыларды игеруге, өз әлеуетін іске асыруға және болашақ мамандығын анықтауға көмектеседі.

«Георгий - шығармашыл жасөспірім, графикалық планшетте сурет салуды үйренді, компьютерді жақсы көреді және әрқашан көңіліне жақын не істеу керектігін табады. «Leader Z» туралы жоба физикалық шектеулерге қатаң талаптар қоймайтынын және ерте жастан бастап балалар жаңа дағдыларды үйреніп қана қоймай, сонымен қатар мамандықты анықтай алатынын естігенде, біз бірден өтініш бердік. Қазір Георгий «Скетчинг» курсында оқиды, қылқаламмен және бояумен сурет салу техникасын меңгерді. Көп адам оның аталмыш дүниелерді қалай аяқпен істейтініне таңғалады. Балам болса, маған әрдайым: «Мама, мен әлі кәсіби сурет салуды үйренемін, ақша табамын және сізге көмектесемін», - дейді. Солай болатынына сенемін де. «Samruk-Kazyna Trust» тарапына мектепті қолдағаны және  балаларымыздың жаңа жағдайда жарқын келешекке ұмтылуға мүмкіндік бергені үшін зор алғысымды айтамын. Жалпы елімізде ерекше балаларға және олардың дамуына қамқорлық жасайтын ұйымдар бар екеніне өте ризамын», - дейді Анна.

Мектепте Қазақстанда тұратын, жасы 13-тен асқан 60-қа жуық жасөспірім оқиды.  Жоба тегін және балаларға болашақта жұмысқа орналасу үшін кәсіби дағдыларын дамытуға көмектеседі. Жасөспірімдер браузермен, электрондық поштамен, қосымшалармен және бағдарламалармен жұмыс тәрізді негізгі компьютерлік дағдыларды үйренеді. Әрі қарай, қабілеттері мен ниеттеріне қарай курстарға бөлінеді: мобилография, скетчинг, scratch және STEAM.

Барлық курс олардың балалар үшін қолжетімділігін ескере отырып таңдалған және әртүрлі бағытқа ие. Мысалы скетчинг шығармашылық қабілетті ашуға көмектессе, мобилография уақытының көп бөлігін қолындағы смартфонмен өткізетін балаларға қолайлы.

 «Кәсіби бағдарлану жасөспірімдердің өмірінде маңызды екені анық, даму ерекшеліктері бар жасөспірімдер де бұдан тыс қалмауы тиіс. Олар оқуға тіпті айрықша мол құштарлықпен ден қойып, барлық ақпаратты бойларына сіңіруден бөлек, оны бірден қолдануға тырысады. Біздің жас студенттеріміз диагноз қаншалықты күрделі болса да, мүмкіндігі шектеулі адамның дамуына, кәсіби өсуге ұмтылуына және еңбек ету құқығын жүзеге асыруына кедергі жасай алмайтынын өздерінің өнегесімен дәлелдеп жатыр», – дейді ITeachMe қорының директоры Захира Бегалиева.

Мамыр айында бағдарламаны 2021 жылы бастаған студенттер, соның ішінде керемет жетістіктерге жеткен кейіпкеріміз -  Георгий Павленко да аяқтайды деп күтіліп отыр.

Comments are closed.