Еуразия Медиа форумы аясында КЕҰ-ға арналған мастер-кластар мен журналистерге арналған дөңгелек үстелдер өтеді

XVII Еуразиялық Медиа форумының бірінші күні қатысушыларды шеберлік сыныптары мен дөңгелек үстелдер күтіп тұр. Көрермендер оларды онлайн режимде көре алады.

Мастер-класстар «КЕҰ және әлеуметтік сторителлинг үшін бейнематериалдар жасау», «сыни ойлау неге маңызды?», «Болашақты қалай басқаруға болады?», «БАҚ аудиториясы - өзара әрекеттесу форматтары», «Digital me: әлеуметтік желілерде отыру әдетінен AI мен сингулярлыққа қосылу» және «Әлеуметтік маркетинг» тақырыптарында өтеді.

Мастер – кластар форумның әлеуметтік серіктесі – «Samruk-Kazyna Trust» Қорының қолдауымен өтеді.

«Біз форумның мастер-кластарында коммерциялық емес ұйымдардың өкілдерін, журналистерді, журфактардың студенттерін және барлық мүдделі мамандарды күтеміз. Біз медиа саланың соңғы трендтерінен хабардар болып, жұмыста заманауи құралдарды пайдалана алуы үшін қазақстандық аудитория үшін осы мастер-кластардың күн тәртібін қалыптастырдық», – деп атап өтті «Samruk-Kazyna Trust» Әлеуметтік жобаларды дамыту қорының ресми өкілі Иргебаев Мирас.

Форумның алғашқы күні ашық талқылаулар өтеді.

Дөңгелек үстел тақырыптарының бірі: «Түркітілдес елдердегі БАҚ. Жаңа шынайылық жағдайында ынтымақтастықты дамыту». Ұйымдастырушылардың айтуынша, бірлескен медиажобаларды құру арқылы түркітілдес елдердің БАҚ серіктестік форматы айтарлықтай кеңейе алар еді. Жаһандық күн тәртібіне жедел жаңалықтарды дайындау кезінде бейне-аудио және мәтіндік ақпаратпен алмасу ерекше қызығушылық тудырады. Әлеуетті ынтымақтастықтың осы және басқа да аспектілерін беделді спикерлер талқылайды: тележүргізуші, Әзірбайжан президентінің экс-баспасөз хатшысы Тофик Аббасов, Венгриядан келген «Дуна» телекомпаниясының директоры Палффи Иштван, Қырғызстаннан келген «Кабар» ақпараттық агенттігінің директоры Кубанычбек Таабалдиев, өзбек ұлттық телерадиокомпаниясының төрағасы Алишер Хаджаев және белгілі түрік журналисті және жүргізушісі, NTV шетелдік жаңалықтар жөніндегі менеджері Ахмет Йешилтепе.

Екінші дөңгелек үстелдің тақырыбы «Жаңа бетбұрыс: Ауғанстандағы оқиғалар Орталық Азия аймағына қалай әсер етуі мүмкін?». Дөңгелек үстелде 15 тамыздағы «Талибан» радикалды қозғалысы Ауғанстанның бүкіл аумағында бақылауды орнатқаны туралы хабарлаған кездегі оқиғалар талқыланады. Қазақстан Республикасының Ауғанстандағы бұрынғы Төтенше және Өкілетті Елшісі Өміртай Бітімов, қазақстандық тарихшы және шығыстанушы Сұлтан Әкімбеков, Өзбекстаннан келген саясаттанушы Бахтияр Эргашев, Пәкістанның АҚШ-тағы бұрынғы елшісі және Гудзон институтының Оңтүстік және Орталық Азия бойынша аға ғылыми қызметкері және директоры Хусейн Хаккани, Тәжікстаннан келген саяси ғылымдарының кандидаты Саймидин Мирзоев қауіпті Ауғанстандағы оқиғалар көрші елдерге қалай әсер ететіндігін талқылайды. Дөңгелек үстелдің модераторы қазақстандық дипломат, тарих ғылымдарының кандидаты және Нұрсұлтан Назарбаев Қорының Халықаралық бағдарламалар орталығының басшысы Қайрат Әбусейітов болады.

Еуразиялық Медиа Форум үздік әлемдік сарапшыларының басын қосады. Мысалы, биыл Қазақстанға ЕҚЫҰ-ның БАҚ бостандығы мәселелері жөніндегі бесінші өкілі Тереза Рибейро, режиссер және продюсер Тимур Бекмамбетов, тележүргізуші және журналист Ксения Собчак, ғалым, философ, «виртуалды шындық» терминінің авторы Джарон Ланье, Кремний алқабындағы цифрлық революция саласындағы сарапшы Эндрю Кин, журналист және «подкаст» терминінің авторы Бен Хаммерсли, сондай-ақ Euronews, Bloomberg, Mash, EUObserver және басқа да ұйымдардың өкілдері келеді.

Пікір үстеу