Өзгелер ойлағанша, мен әрекет етемін: табысқа жеткен қызылордалық әлеуметтік кәсіпкердің оқиғасы

Бүгінгі таңда Орталық ай сайын 46-дан астам «ерекше» баланы қабылдайды және өзінің тиімділігін дәлелдеп келуде: орталықтың белсенді жұмысының 11 айында бенефициарлардың 80%-дан астамының оқуында, түзетуінде, сөйлеуі мен мінез-құлығында, дене шынықтыруда, қоғамға бейімделуінде, мектепке дайындығында және басқа да көрсеткіштерде оң динамика байқалады.

Бір жыл бұрын Аутизм мен сөйлеуді түзету орталығы тек қағазға жазылған жоба болды деп сену қиын. Бірақ жігерліліктің, үздіксіз жұмыстың және ерекше қажеттіліктері бар балаларды оңалтуға көмектесетін нақты мекеме құруға деген ұмтылыстың арқасында Орталық ашылып қана қоймай, аймақтағы ең үздіктердің біріне айналды.

Мұның бәрі жеке оқиғадан басталды. Розалия Рахимова – «Розалия және Эмир» Жеке қорының басшысы, аутизм мен сөйлеуді түзету орталығының директоры. Ол бірнеше жыл бұрын «аутизм» диагнозы қойылған «ерекше» сәби Эмирдің анасы және мықты әйел.

Кез-келген ана сияқты, Розалия Рахимова ұлына ең жақсы мамандарды, ең жақсы оңалтуды, ең жақсы білімді бергісі келді. Осының бәрін іздеуде ол бүкіл Қазақстанды, тіпті Ресейдің кейбір орталықтарын аралап шықты.

«Біз өз жолымызда түрлі проблемаларға тап болдық: кезек, күту, қызметтердің жоғары құны, ұзақ қашықтық. Сол кезде Қызылордада осындай орталық ашу, оны балалар мен олардың ата-аналарына қолжетімді ету, жақсы мамандар жинау идеясы пайда болды», - дейді Розалия Рахимова.

Идеядан бастап оны толық іске асыруға дейін жас ана үш жылдық жолдан өтті. Осы уақыт ішінде ол оқыды, басқа орталықтармен серіктестік байланыс орнатты, біліктілігін арттырды. Розалия Рахимова үшін соңғы серпін «Samruk-Kazyna Trust» Әлеуметтік жобаларды дамыту қорынан «Әрекет» әлеуметтік кәсіпкерлік бойынша гранттар байқауына қатысу және жеңіске жету болды.

«Біз үшін бұл жаңа білім алу тұрғысынан үлкен тәжірибе болды: біз әлеуметтік кәсіпкерлікті егжей-тегжейлі зерттедік, әр жолы қызықты дүниелерді біліп, күндіз-түні оқыдық деп айтуға болады. Сонымен қатар, біз маркетинг және PR, қаржы, презентация және т.б. бойынша шеберлік сабақтарынан өттік. Оқу соңында біз өз жобамызды қорғадық, жеңімпаздардың бірі болдық және осы істі дамытуға грант жеңіп алдық», - дейді Розалия.

Қызылорда облысында Розалия Рахимованың жобасы алғашқылардың бірі болып әлеуметтік кәсіпкерлік форматын АСБ, эпилепсияға ұқсас диагноздары бар балалардың әлеуметтік мәселесін шешу үшін қолданды. 2 айдан кейін аутизм мен сөйлеуді түзету орталығы әлеуметтік мәселені шешуге және КЕҰ-ның сыртқы қаржыландыруға тәуелділігін төмендетуге көмектесетін өзін-өзі толық қамтамасыз етуге көшті.

«Әлеуметтік кәсіпкерлік Қазақстан үшін жаңа құбылыс, бірақ қиындықтарға қарамастан, біз мемлекет пен донорлық ұйымдардың қазірдің өзінде кәсіпкерліктің осы түрін дамытуға үлкен қызығушылық танытқанын көріп отырмыз», - дейді Орталық басшысы.

Бүгінгі таңда «Розалия және Эмир» ЖҚ білім беру саласындағы мәселені аймақтық деңгейде шешеді - бұл ақыл-ой кемістігі мен эпилепсиясы бар балаларды оқыту және түзету. Орталықта логопедтер, дефектологтар, психологтар, ЕДШ-мамандар, АВА-терапевтер жұмыс істейді. Орталықтың педагогикалық қызметкерлері оларды күнделікті өмірге дайындау үшін балалармен түзету, дамыту, оқыту жұмыстарын жүргізеді. Сабақтар барлық қажетті дидактикалық, педагогикалық және спорттық құрал-жабдықтары бар бірнеше оқу кабинеттерінде өтеді.

Орталыққа бару айына 10 000 теңгеден 45 000 теңгеге дейін тұрады - бұл Қызылорда облысы мен Қызылорда қаласы бойынша ең төменгі баға. Бұдан басқа, әрбір 10-шы бала орталықта өтеусіз негізде оқиды - бұл әлеуметтік жағынан осал отбасылардан шыққан балалар, қамқоршысыз қалған балалар және өмірлік қиын жағдайға тап болған аналардың балалары. Орталықта бір жыл ішінде жалпы саны 30 бала тегін көмек алды.

Айта кету керек, орталық балаларға қызмет көрсетуден басқа, ата-аналармен жұмыс істейді, оларды қауымдастыққа біріктіреді. Мұндай көмек Қызылорда облысындағы «ерекше» балалардың ата-аналарына бұрын соңды берілмеген. Балалардың ата-аналары үшін орталық бір-бірімен қарым-қатынас жасау және тәжірибе алмасу алаңына және эмоционалды қолдау орнына айналды.

Оның сәттілік құпиясы неде деген сұраққа жауап бере отырып, Розалия Рахимова атап өтті:

«Менің құпиям - бұл болашақты көру және алынған нәтижелерді талдау арқылы ойластырылған әрекеттер. Мұның бәрі міндетті коммуникациямен, үнемі оқыту арқылы біз көріп отырған оң нәтижені береді».