Білім алуында ерекше қажеттіліктері бар 6 700-ден астам бала түзету кабинеттерінде көмек алды

Бұл жоба білім беру мен дамуға қол жеткізуде ерекше қажеттіліктері бар балалардың мүмкіндіктерін кеңейтуге бағытталған (ментальдық бұзылулар, аутизм және БМС, сөйлеу қабілеті дамуының тежелуі, тірек-қимыл аппаратының бұзылулары және т.б.). Осы жобаның арқасында «ерекше» балалар қоғамдық өмірге және оқуға белсенді араласады, қоғамға жақсы бейімделе алады.

«Қазақстанда инклюзияны дамыту маңызды бағыт болып табылады, өйткені денсаулық жағдайына қарамастан адамдар құқықтарының тең болуы қоғамның өсуіне ықпал етеді. ППТК және ресурстық орталықтар жыл сайын ерекше қажеттіліктері бар 2 000-нан астам балаға қызмет көрсетеді. Сонымен қатар, ағымдағы жылы «Самұрық-Қазына» АҚ «Қамқорлық» бағдарламасы аясында ҚР Тұңғыш Президенті – Елбасы қорымен бірлесіп 4 000-нан астам баланы медициналық оңалтумен және педагогикалық түзетумен қамтитын қосымша 8 оңалту орталығы мен 8 инклюзивті қолдау кабинетін ашу жоспарлануда», - деп атап өтті «Samruk-Kazyna Trust» Әлеуметтік жобаларды дамыту қорының ресми өкілі Мирас Іргебаев.

ППТК бірнеше кабинеттерді қамтиды, онда сурдологтар, логопедтер, дефектологтар, психологтар және басқа да мамандар балаларға есту, сөйлеу, мінез-құлықты түзетуге көмектеседі, оларды басқа балалармен өзара іс-қимыл жасауға үйретеді, тұрмыс жағдайында өзіне-өзі қызмет көрсету дағдыларына үйретеді. Бұл балаларға жақсы әлеуметтенуге және жалпы білім беретін мектепке түсуге дайындалуға көмектеседі.

Ресурстық орталықтар мектеп базасында жұмыс істейді және осы оқу орнына барған үлкен жастағы балаларға көмек көрсетуге бағытталған. Мұнда ерекше білім беру қажеттілігі бар бала оқу кезінде көмек ала алады. Қажет болған жағдайда педагогтар балалармен қосымша жеке сабақтар өткізеді, белсенді физикалық жаттығулар арқылы көмектеседі.

Инклюзивтік орталықтарды ашу үш жақты ынтымақтастық шеңберінде жүзеге асырылады – жергілікті атқарушы орган өтеусіз үй-жайды ұсынады, коммерциялық емес ұйымдар «Samruk-Kazyna Trust» қолдауымен үй-жайларды бейімдеу, кедергісіз орта құру, мамандарды материалдық-техникалық жарақтандыру және оқыту жұмыстарын жүргізеді.

Айта кетейік, ППТК Нұр-Сұлтан, Қарағанды, Көкшетау, Ақтөбе, Өскемен, Шымкент, Тараз, Петропавл, Орал, Семей, Екібастұз қалаларында жұмыс істейді. Ресурстық орталықтар – Нұр-Сұлтан, Ақтөбе, Павлодар, Өскемен, Көкшетау, Шымкент қалаларында орналасқан. Түзету кабинеттерінде немесе ресурстық орталықтарда көмек алу үшін «ерекше» балалардың ата-аналарына тұрғылықты жері бойынша психологиялық-медициналық-педагогикалық консультацияға (ПМПК) жүгіну қажет.

Инклюзивті білім берумен қатар, «Samruk-Kazyna Trust» Қоры «Мүгедектігі бар балалардың ата-аналары қоғамы «Тең мүмкіндіктер әлемі» ҚБ-мен бірлесе отырып, бейімделген дене шынықтыру бағытын дамытады. Бүгінде Нұр-Сұлтан қаласындағы 150-ден астам бала инклюзивті спорт секцияларына қатысып, спортпен айналыса алады. Талдықорған қаласында тағы бір бейімделген дене шынықтыру залы жұмыс істейді, ол «Әрекет» әлеуметтік кәсіпкерлік жобасы аясында ашылды.

Баланы Нұр-Сұлтан қаласындағы бейімделген спорт секциясына келесі байланыс телефоны арқылы жазуға болады +7 701 710 70 68 -  Нұргүл Олжекова, «Мүгедектігі бар балалардың ата-аналары қоғамы «Тең мүмкіндіктер әлемі» ҚБ төрайымы. Талдықорған қаласындағы бейімделген дене шынықтыру залына жазылу үшін мына телефон арқылы хабарласуға болады:   +7 777 972 85 53 – Камила Ситосманова, «Другая жизнь» ҚҚ жетекшісі.